Олон улсын хөдөлмөрийн байгууллагаас жил бүрийн 04 дүгээр сарын 28-ны өдрийг “Ажлын байран дахь хөдөлмөрийн аюулгүй байдал, эрүүл ахуйн дэлхийн өдөр” болгон олон улсын хэмжээнд тэмдэглэж ирсэн бөгөөд манай улс 2012 оноос эхлэн хөдөлмөрийн аюулгүй байдал, эрүүл ахуйн сарын аян өрнүүлж, тус аяны хүрээнд хууль тогтоомжиг сурталчилах, үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх, ажилтны эрүүл мэндийг хамгаалах, ажлын байрны соёлыг төлөвшүүлэх, сургалт, сурталчилгаа зохион байгуулах зэрэг олон арга хэмжээ зохион байгуулсаар ирсэн билээ.
Орхон аймгийн Хөдөлмөр, халамжийн үйлчилгээний газар, Орхон аймгийн Хөдөлмөрийн аюулгүй байдал, эрүүл ахуйн зөвлөлд Хөдөлмөр, нийгмийн хамгааллын яамнаас ирүүлсэн албан бичгээр 2024 оны Хөдөлмөрийн аюулгүй байдал, эрүүл ахуйн сарын аяныг зохион байгуулах чиглэл ирсний дагуу Орхон аймгийн Хөдөлмөрийн аюулгүй байдал, эрүүл ахуйн зөвлөл нь “Уур амьсгалын өөрчлөлтийн нөхцөлд эрүүл, аюулгүй хөдөлмөр эрхэлцгээе” гэсэн уриатай уялдуулан 12 ажил төлөвлөн хэрэгжүүлж эхлээд байна. Үүний нэг бол Хөдөлмөрийн аюулгүй байдал, эрүүл ахуйн сарын аяны нээлтийн үйл ажиллагаа юм.
Нээлтийн үйл ажиллагааг 2024 оны 04 дүгээр сарын 12-ны өдөр Орхон аймгийн Жаргалант сумын соёлын төвд зохион байгууллаа. Нээлтийн үйл ажиллагааг Жаргалант сумын ЗДТГ болон Орхон аймгийн үйлдвэрчний эвлэлийн холбоо, ажил олгогч эздийн холбоо хамтран зохион байгууллаа.
Нээлтийн үйл ажиллагааг нээж Орхон аймгийн нийгмийн бодлогын хэлтсийн ахлах мэргэжилтэн Г.Эрдэнэбулган, Орхон аймгийн Үйлдвэрчний эвлэлийн холбооны дэд дарга З.Соёлмаа, Жаргалант сумын ЗДТГ-н дарга Т.Энхжаргал нар үг хэллээ.
Уг арга хэмжээнд “Хөдөлмөрийн аюулгүй байдал, эрүүл ахуйн тухай” мэдлэг олгох ерөнхий ойлголт сэдвээр сургагч багш З.Соёлмаа, “Уур амьсгалын өөрчлөлийн нөхцөлд эрүүл аюулгүй байдлыг яаж хангах талаар” Онцгой байдлын газрын байцаагч Э.Сонинзаяа, Жаргалант сумын мал эмнэлэгийн мэргэжилтэн нар малчид, тариаланч, хүүхэд залуучууд, ААНБ-уудад мэдээлэл өглөө.
Тус арга хэмжээнд Хөдөлмөр, халамж үйлчилгээний газар, Стандарт хэмжилзүйн хэлтэс үйл ажиллагаагаа иргэд олон нийтэд танилцуулж, малчдад зориулан гарын авлага бэлтгэн тараан өглөө.
